e-gorren blog pertsonala (komikiak, informatika eta beste)
Frantziako anderearen ahozko tradizioko euskal baladaren kontakizuna komikiratu dute
Frantziako anderea ahozko tradiziotik jasotako euskal balada ezaguna da, hainbat bertsio dituena, horien artean ezagunenetakoa ziurrenik Hiru Truku musika taldeak egindakoa izanik, justu horregatik. Balada horretan kontatzen den istorio tragikoan, Frantziako erreginaren dama bat eta Bizkaiko aiton-seme bat maitemindu egiten dira eta ezkon-hitza ematen diote elkarri, baina etxera itzultzean mutilaren amak hori gustuko izan ez eta semeari agintzen dio dama bertara ezkontzera datorrela bidean atera eta hiltzeko...
Istorio hori komikira ekarrita argitaratu du orain Bizkaiko argitaletxe El Gallo de Orok, Frantziako dama izenburuarekin. Álvaro Rabellik egin du gidoia eta José Carlos Torrek marrazkiak.
Kartzelako bizitzaren kontakizunak, "Barruan" komikian
Ataramiñek, euskal errepresaliatu politikoen sorkuntza lana sustatu eta zabaltzeko helburua duen elkarteak, presoek idatzitako zenbait komiki argitaratu zituen aurreko hamarkadaren lehen erdian: Mikel Orbegozoren Preso nago (2010), Preso nago 2 (2013) eta Ilargiraino! (2015) eta Borxa Urberuagaren Espetxetik at (2011). Bada, hamarkada hau estreinatzeko, Gartxoten Barruan argitaratu zuen iazko azken hilean.
Presondegiko bizitzaren istorioak kontatzen dira bertan, gordintasunez baina, ahal den neurrian, goxotasunez eta umorez ere bai. Gartxot ezizenez sinatzen duen egilearen pean 2000ko hamarkadan Frantziako espetxeetan egondako preso bat dago. Eta komikiak bere esperientzia pertsonaleko kontu batzuk badakartza ere, beste kide batzuei gertatutakoak edo haiei entzundakoak ere badaude, kartzelako bizitzaren kontakizun kolektiboa osatuz.
"Hodeien gaineko aldean", maite den pertsona baten suizidioaren minari buruzko komikia
Nola egin aurre bikotekidearen suizidioari? Leire erantzun bila abiatzen da, edo ihesi, batek daki, baina errepideko hotel batean gelditu eta, ezertarako indarge, bertan geratzen da egun bat eta bestea eta bestea... Eta bertako pertsonaia bitxiek lagunduko diote bidea aurkitzen, edo berak beraiei...
Hau da Bertol Arrietaren gidoia eta Sandra Garayoaren irudiak dituen Hodeien gaineko aldean komikiaren gaia, Txalapartak atera duena. Gai arantzatsua eta gogorra, komikian laztasunaz gain samurtasunez ere lantzen asmatzen dutena.
Andres Espinosa gerra aurreko euskal mendizale handi bezain ezezagunaren bizitza komikira ekarri dute Suak eta Mendi Film Festival-ek
Andres Espinosaren bizitza guztiz harrigarria da. Zornotzan 1903an jaioa, oso gaztetatik mendizaletu zen, eta hala hainbat igoera zail egin zituen modu oso berezi eta sinestezinean. Bakarrik, sokarik gabe eta espartinekin egiten zuen espedizio osoa, gauak ere mendian altuera handian pasatuz, eta hala igo zituen Mulhacen, Teide, Urriellu, Mont Blanc, Aiguille du Midi, Cervino, Sinai, Kilimanjaro, Toubkal eta beste! Gainera, Urriellura sokarik gabe igotzen lehena izan zen, eta Alpeetakoak eta Afrikakoak behintzat bakarka inork inoiz egindako lehenak izan ziren! Kangchenjunga igotzeko asmoz ere joan zen Himalaiara, baina bakarrik joaten ez zioten utzi, eta nazien espedizio batekin ezin batuagatik, igo gabe gelditu zen. Gero, Espainiako Gerra Zibilak eten zuen haren ibilbidea.
Orain Suak eta Mendi Film Festival-ek haren bizitzari buruzko komikia atera dute, Andres Espinosa - Bakarrik eta libre, Ramon Olasagastiren gidoiarekin, César Llagunoren marrazkiekin eta Felipe H. Navarroren kolore eta errotulazioekin. Modu bikaina euskal mendizaletasunaren aitzindari ezezagun honen abenturak ezagutzeko!
"Makina Maixu 1 - Rol Fu-aren bidea", rol jokoa komikian!
Euskara eremu gero eta gehiagotan presente dagoen heinean, eremu frikiak ere bereganatzen ditu. Komikiena ere hala da neurri batean, berriki mangaren alorrera ere iritsi da... Eta duela pare bat urtetik hona rol jokoen mundura ere iritsi da euskara, gainera erritmo ikaragarrian haziz. 2019ko Durangoko Azokan aurkeztu zen euskarazko lehenengo rol jokoa, Atopia RPG, aurreko urteko azokako Sormen Beka irabazi zuena. Geroztik, beste lau behintzat atera dira: Adur, Pastorola, Gudamailu eta Taroka (azken hau rol jokoa baino gehiago ere bada, baina tira).
Bada, frikitasunaren biribila biribilduz, aurtengo Durangoko Azokan istorioa komikian kontatzen duen rol jokoa atera zen! Makina Maixu 1 - Rol Fu-aren bidea da komiki-rol joko hau, eta bertako istorioan Makina Maixuk rol-fuaren bidean zehar gidatuko gaitu, euskal historia eta mitologian barna, Perurena, Barandiaran, Basajaun, sukaldariak, Elkano... eta beste hainbat pertsonaiarekin topatuz.
Komikia bera atalka joan da argitaratzen Rolariak-en webgunean eta sare sozialetan, eta horren lehen denboraldiko atalak dira komiki honetan batzen direnak. Benetan barregarria da, "...eta heriotxa emango diosu!" zioen hartan inspiratutako protagonistarekin.
Euskara, jalgi hadi komiki-rolen plazara!
"Itsasoan urak handi", HB eta Lo-li-ta munduan barna
Azken bizpahiru urteotan Xabiroi komiki-aldizkariaren orrietan atalka atera ondoren, Xabiroik, ohi duen moduan, album formatuan argitaratu du Haur besoetakoa sailaren hirugarren albuma ere. Itsasoan urak handi izeneko honetan, HB (Haur Besoetakoa) eta Lo-li-ta munduan zehar erbesteratuta dabiltza, haurrek agintzen duten euren erreinuak ez baititu betiko garai onenak bizi, eta haren kontrola berreskuratzeko bidean biziko dituzten abenturak kontatuko dizkigute Unai Iturriaga gidoilariak eta Alex San Vicente Sanvi marrazkigileak. Lortuko al dute?
"Ainhoa", "Black is beltza"-ren jarraipena, oraingoan Manexen alabarekin 80ko hamarkadaren amaieran
Black is Beltza komikia 2014an atera zen eta handik lau urtera hartan oinarritutako animaziozko filma. Bada, orain haren jarraipena, Black is Beltza 2 – Ainhoa, ia-ia batera atera da film eta komiki formatuan. Elkarrek atera duen komikiaren gidoian aurreko Fermin Muguruza eta Harkaitz Canori Isa Campo batu zaie, eta irudiak Susanna Martínek egin ditu. Oraingoan, lehenengoaren protagonista Manexen alaba Ainhoak biziko ditu hainbat abentura 80ko hamarkadaren amaieran Kuban, Euskal Herrian, Libanon, Afganistanen, Kurdistanen, Marseillan... orduko giro politiko eta soziala islatuz.
"Cube Arts 1", manga gehiago euskaraz!
Gogoratzen duzue duela gutxi nola esan genizuen lehenbizikoz argitaratu zela manga bat euskaraz (X-Venture – Gorputza krisian seriearen lehen bi zenbakiak, hain zuzen)? Bada, harekin nahikoa ez, eta Harriet argitaletxeak beste bat ere atera du! Kasu honetan, Japoniako manga da, hango hizkuntzatik zuzenean euskarara Iker Alvarezek itzulia, eta gaztelaniaz aterako ez dena. Tomomi Usuiren Cube Arts 1 honetan, Takuto gaztea Cube Arts bideo-jokoaren demoaren barruan sartzen da, Minecraft asko gogorarazten duen blokez osatutako mundu batean, eta abentura zirraragarri eta beldurgarriak biziko ditu bertan bere lagunekin eta han ezagutuko dituen beste pertsonaiekin. Berri oso ona argitalpen hau, eta, gainera, Harriet-ek laster manga gehiago aterako omen ditu. Segi horrela!
Harriet argitaletxeak Duhamel-en "Inoiz ez"-en jarraipena atera du
Pozgarria da Harriet argitaletxeak Bruno Duhamelen lanak euskarara ekartzen jarraitzea (seigarrena da hau), bere lanak istorio bitxiz, samurtasunez eta aldarrikapenez beteta baitaude. Inoiz ez 2 – E eguna honetan, Madeleine atso itsu burugogorra eta Normandiako itsaslabarretan behera erortzear dagoen bere etxearen kontakizunaren jarraipenean, istorioa are gehiago konplikatuko da: nazien bunkerrak, erorketak, isolamendua, alkategai ultraeskuinekoak...
Yezidien sarraskia, erresistentzia eta autonomiaren lekukotza, "No sleep till Shengal"-en
Zerocalcare komikigile italiarraren lanik ezagunena ziurrenik Kobane Calling izango da, Siriako gerraren erdian kurduek eraikitako Rojavako lurralde autonomora egindako bidaiaren kronika. Bada, orain No sleep till Shengal komikian 2021ean Irakeko iparraldean dagoen yezidien lurralde autonomora, Shengalera, egindako bidaia eta haiek jasandako triskantza eta erakusten duten erresistentzia kontatzen ditu. Jatorrizkoak italiarrez argia ikusi eta gutxira atera du euskaraz Farmazia Beltzak, beste hizkuntza asko baino lehenago. Berriz ere, ezinbesteko jakingarriak Zerocalcare-ren ohiko estilo pertsonal berezi eta umorezkoan.