Dokumentu Akzioak
e-gorblog
Komikiekin lotutako ekitaldi ugari Bilboko Alhondigan maiatza amaiera honetan hasita
Jardunaldiak, erakusketak, tailerrak...
Irudia: AlhóndigaBilbao / Clara-Tanit Arqué / Pernan Goñi
Bihartik hasita eta uda osoan zehar komikiekin zerikusia duten ekitaldi ugari antolatu dituzte Bilboko Alhondiga ireki berrian.
Batetik, maiatzaren 25etik 28ra (bihartik ostiralera bitartean, beraz), AlhóndigaKomik jardunaldiak egingo dira. Berauetan, goizero 9:00etatik 11:00tara hitzaldiak egingo dira: 25ean Komikiaren mundua Álvaro Ponsen eskutik, 26an Iparramerikako merkatua. Superheroiak Pasqual Ferryren eskutik, 27an Egile-eskubideak. Nazioarteko legediak Javier Díaz de Olarte eta Guillermo Velascoren eskutik eta 28an Japoniako merkatua. Mangaren genero desberdinak Ken Niimuraren eskutik. Gainera, egunero 11:00tatik 14:00etara eta 16:00tatik 18:30era tailer praktikoak izango dira komikiaren hiru genero enblematikoren
inguruan (Europa abenturak, Asiako manga eta
AEBetako superheroiak) Toni Guiral, Pepe Gálvez eta Jesús Redondorekin. Amaitzeko, 18:30etik 20:00etara Komikizketak izango dira Álvaro Pons edo Antonio Altarribak moderatuta, partaide hauekin: 25ean Clara-Tanit Arqué eta Lola Lorente, 26an Ana Miralles, 27an Pasqual Ferry eta 28an José Maria Berenguer.
Bestetik, 100x100 komiki eta Un año en Angoulême erakusketak inauguratuko dira bihar 25 20:00tan, eta abuztuaren 20ra arte egongo dira. Lehenengoa, 100x100 komiki, Alhóndiga Bilbao eta Cité Internationale de la Bande Dessinée et de l’Image de Angoulêmek antolatzen dute eta bertan inoizko 50 komikirik onenetakoak egongo dira ikusgai, gaur egungo egileek horietaz egindako 50 bertsioz gain. Bigarrena, Un año en Angoulême izenburuduna, Clara-Tanit Arqué eta Lola Lorentek AlhóndigaKomik bekarekin Angoulêmeko La Maison des Auteursen urtebetez egindako egonaldian zehar landutako obrari buruzkoa da.
Horrez gain, Pernan Goñi komikigile eta twitterlari ezagunak bi tailer gidatuko ditu: lehenengoa komikien autoedizioari buruzkoa da eta ekaineko 10 egunetan izango da 17:30etatik 19:00tara, 12 urtetik aurrerako gazteei zuzendua eta gaztelaniaz; bigarrena komikia eta antzerkiari buruzkoa da, ordu berean ekaineko beste 8 egunetan, 8 eta 12 urte bitarteko haurrentzat eta euskaraz.
Amaitzeko, badirudi beste ekitaldi batzuk ere egongo direla, orri honetan ikus daitekeenez: bisita gidatua Antonio Altarribarekin maiatzaren 29an, Komikiaren hastapenak tailerra maiatzaren 29an, Autoeditatuak/Do it yourself topaketa ekainaren 12an eta Komiki egun bat uztailaren 8an. Baina ez dut informazio gehiago aurkitu hauen inguruan...
Egitarau oparoa, zalantzarik gabe, Bilboko Alhondigako hau. Eta urtean zehar beste hainbat gauza ere egiten dute. Segi horrela!
Alternatiba onak
Botxotik, muito obrigado Leturia.
Azkenean
Lehenik eta behin Alondegian egin izan dabena, lan hiperluzeak egin ostean, ederra baino ederragoa da, Bartzelonan eta atzerrian lantzean behin ikusten diran eraikin bitxi horien antzekoa baita Alondegi barria: Egitura zaharren ganean espazio eta osagai modernoak txertatuta, eraikina itzela gelditu da. Ikusteko modukoa inolako zalantza barik, kanpokoentzat beste osagai erakargarri bat, Guggenegaz batera.
Bestela, erakusketa bera ikusi genduan, "100x100 komikia", eta hori be ikusteko modukoa, oso modu txukunean ipinita eta kontraste ederrak emoten ebezana, komiki zaharrak berrikuspen modernagoen ondoan, Mendebaldeko estetika Ekialdekoaren ondoan (Korea,Txina, Japonia). Erabat interesgarria, klasikoen artean (bikote galiarra hortxe egoan adibidez) Tintin ez egoan arren.
Laburbilduta, geure alkatea txit zezenketazaleak askotan puntuak galtzen dituan arren (aurtongo Aste Nagusian hiru txosna gitxiago egongo da), Iñaki Astunak beste askotan puntuak berreskuratzen ditu, eta Alondegiagaz puntu mordoa irabazi dau.
Au revoir!