Hemen zaude: Hasiera → Blogak → Amatiño → Artxiboa → 2010 → Martxoa → 30 → Ontsa lehiatzeko bidea
Dokumentu Akzioak

Amatiño

Ontsa lehiatzeko bidea

Lehiakorrak izaten jarraitzekotan, energia urriago behar izango duen industriaren apustua egiteaz gainera, guk geuk izan beharko dugu –jarreraz, prestakuntzaz eta ezagutzaz– gero eta lehiakorragoak, oinarrizko energia kanpotik ekartzen jarraitu beharko baitugu luzaro.

Saudi Arabiako Industria ministroari galdetu diote zein ote bere etorkizun-estrategia. Baita azkar erantzun ere: “Energia asko behar izango duen industria motaren aldeko apustua”. Mendebalde osoak ahalik eta energiarik gutxieneko industria amesten duen artean, Arabiak justu bestelakoa du helburu. Arrazoia guztiz ulergarria da, alegia: energia gero eta garestiagoa izango denez gero eta erreserbarik handienak arabiar penintsulan bertan egon, saudi industria izango da lehiakorrena energia asko behar duten sektoreetan.

Beste muturrean,  Euskal Autonomia Erkidegoa da –Luxenburgo, Malta eta Zipreren ondotik– kanpoko energia-menpekotasunik handiena duten europar herrialdeetakoa. Eta industria gure kontsumoaren %46,5 da, EB-27an %27,6 den artean.

Beraz, lehiakorrak izaten jarraitzekotan, energia urriago behar izango duen industriaren apustua egiteaz gainera, guk geuk izan beharko dugu –jarreraz, prestakuntzaz eta ezagutzaz– gero eta lehiakorragoak, oinarrizko energia kanpotik ekartzen jarraitu beharko baitugu luzaro.

Argia, 2010eko martxoaren 28an.

Demanda energetica

Amatiño 2010/03/30

Lehiakortasuna

Jaime — 2010/03/30 15:51
Noiz arte jarraitu behar ote du lehiakortasun lasterketa ero horrek? Erregai fosilen desagerpen kezkagarrian ez ezik, gizakiarengan ere ikaragarrizko eragina du lehiakor nahi izate burubako horrek.
Nire gazte denboran, orain 70 urte badut, ez ziren ikusten hainbeste burusoil eta hain gazte. Hor dugu lehiakortasunaren ondorio bat, eta ez txarrena!!!!!!!!

Lehiakortasunik eza

Amatiño — 2010/03/30 16:57
Batetik, garbi gera bedi gero, lehiakortasuna ez da garapenkeria. Edo, nahiago baduzu, garapenkeria ez da lehiakorra.

Bestetik, lehiakortasuna aukera bat den bezala, lehiakortasunik eza ere beste bat izan daiteke, batere zalantzarik gabe gainera, ez dizut behintzat nik ukatuko. Baina ez da nahiko lehiakortasunik eza aldarrikatzea, gero formulatu egin behar da, zehaztu, arautu, nora garamatzakeen aztertu eta inor konbentzitu. Zuk esan eta ni gertu naukazu ikasteko.

Azkenik. Ni burusoila nauzu azken 45 urteotan. Zein da arazoa?

Lehiakortasuna

Jaime — 2010/03/31 16:38
Arrazoia eman behar dizut: ez daukat hagatxo majikoa aterabide egokia emateko problema honi, hala eta guztiz ere, lehiakortasun lasterketa horrek, nahi ala nahi ez, ezin zeharkatuzko muga batera helduko da egunen batean. Ez da dudarik. Kezkatzen nauena da: non ote dago muga hau? Planetaren suntsipen erabatekoan? Edo Orwelen Big Brother guztiahaldun baten ezartzean, gu besteok jopu edo sehi bilakaturik?
Bai, ezagutzen zaitut Lakuatik, ni 1980.tik berrozi nintzela, zu beti buru argi eta belarri arkazdun. Beharbada, familiatik etor dakizuke soiltasuna edo, aspaldian esaten zenez, sexu-ahalmen handiko izatea. batek daki!
Adiorik ez.

Sexua? Ze sexu?

Amatiño — 2010/03/31 23:37
Lehiakortasunaren muga non ote den galdetzen duzu eta... mugarik ez balego? Alegia, zenbait gauzak muga du eta beste hainbatek ez. Fisikak muga du baina etorkizunak mugarik al du? Bizitzak mugak ditu baina hobekuntzak mugarik al du? Planetak mugak ditu, baina lehiakortasunak ba al du? Berriz diotsut, nik ez dut uste munduaren suntsipena lehiakortasunaren eraginez etorriko denik, lehiakortasunik ezaren ondorioz baino. Adibidez, energia fosilak ez dira dagoeneko lehikortasunaren seinale, lehiakortasunik ezaren adierazgarri baino.

Jaime, Berrozi, Lakua, 1980... Euskara Zuzendari nintzeneko garaiak... Garaikoetxea, Labaien, Retolaza eta gainerakoak. Barkatu, ez naiz nor zaren konturatzen. Alzheimerra, nonbait.

Ez, aita ez zen burusoila. Sexu-ahalmenaz ez nion, ordea, sekula galdetu. Ni, berriz... barkatu, aspaldian Alzheimerraz ari naiz... Zer da sexua?


alzheimerra

jaime — 2010/04/01 18:20
Garai haietan, Lakuako beheko harrerako mahaian, Eulali Aierberen ondoan, eserita egoten nintzen bisitarien datuak apuntatzen kuadernu batean. Errubio,argal eta altuxe nintzen bai eta bizardun ere, oker ez banago. Koro Lasarteren pisuan sua egin zen egun berean, zu eta biok hitz egin genuen horri buruz. Goizeko diosalak zirela eta hitz laburrak izaten genituen.
Har ezazu Gincko Biloba gogoramena suspertzeko.

Uste baino hobeto

Amatiño — 2010/04/02 13:33
Errubio, argal, altuxe eta bizarduna Jaime zenik, ezta hurrik eman ere gero. Hala ere, zuk aipatutako datu guzti horietarik ezezagunena G. Biloba delako hori egin zait. Wikipedian begiratu behar izan dut, zer zenik ere ez nenkien-eta. Honek esangura du dezente ondo nagoela, uste baino hobeto behintzat, horrelakorik hartzeko tentaldirik ez baitut orain arte sekula sentitu. Eskerrik asko susperraldiagatik.

Eta eutsi goiari.

Gincko biloba

jaime — 2010/04/03 15:01
Ez pipertu, medikuntza preventiboa dela eta, orain hogei bat urte edo belar dendako Ginckoaren susterren tantak edaten ditudala egunero. Honen froga, zuk DEIA egunkarian idazten zenuen JOÑO izeneko euskal zutabe interes eta goxagarri haien oroipena frexko-frexko daukat garunean.
Izan untsa.

Joño, joño...

Amatiño — 2010/04/03 15:56
Ez, ez. Inondik ere ez naiz Gincko Biloba hori dela-eta pipertuko. Ez pipertzen ahalegintzen naiz eta are gutxiago huskeriengatik. Baina, ea, ondo ulertu badut... esangura duzu JOÑO delako sail hartan Gincko Biloba horri buruzko zutaberen bat idatzi nuela? Ni ez naiz batere gogoratzen baina, zure lasaitasunerako, sekula ez dut pentsatu ez naizela idatzitako artikuluez gogoratzen alzheimerrik dudalako, milaka idatzi izan ditudalako baino. Eta denek ez nautelako berdin "markatu". Orain dela berrogei urteko batzuk gogoan ditut bart idatzi izan banitu bezala, eta beste batzuk, ostera, ezta berriro irakurrita ere, ez ditut nere egiten.

Erantzuna gehitu

Beheko formularioa betez erantzun bat utzi dezakezu

(Beharrezkoa)
Esaiguzu zure izena
(Beharrezkoa)
(Beharrezkoa)
(Beharrezkoa)
(Beharrezkoa)
Erantzun galderari aurrera jarraitzeko:

Zenbat dira hiru gehi bi? (idatzi zenbakiekin)

Amatiño

Luis Aranberri Mendizabal

Azken erantzunak
areizaga inazio arregi, 2012/05/22
Ez duzu ezer ulertu Amatiño, 2012/05/20
enpresaririk eza Joxemi, 2012/05/19
Edade kontua ez Tre., 2012/05/18
tilin oier g, 2012/04/30