Dokumentu Akzioak
Amatiño
Lehengusinaren alaba
Demagun Sevillatik bueltan norbaitek esaten dizula Andalusiako Energia Agentziaren lehendakariarekin biltzeko aukera izan duela eta haren eskuminak luzatzen dizkizula. “Goraintziak? Neri? Zer dela-eta? Nik ez dakit barren nor denik ere!” Eta erantzuna: “Zelan ez duzula ezagutzen, ez al duzu ba senitarteko?”
Duela hamar urte arte anekdota hutsa izan zitekeena zalantza pizgarria dateke gaur egun, Sareak bapateko aukera ematen baitu hainbat segundutan Andalusiako Energia Agentziaren lehendakaria nor arraio den jakiteko. Nor izango eta, Isabel de Haro Aramberri. Joño!
Ondoren, email pare bat aski da Energia Agentzia andalusiarraren lehendakariarekin harreman zuzenean jartzeko, gehienbat norbera ere Aranberri baldin bada, jakina. Erantzuna zehatza bezain harrigarria: bere amaren aitona Domingo omen, nere Andikaoko aitona elgoibartar berbera alegia.
Ni mutiko koxkorra nintzela, nere lehengusinetako bat Frantziara joan zen, hantxe bertakotu eta, horra, mende erdiren bueltan, haren alaba, nere iloba txikia beraz, Sevillan ernarazi, heziketaz eta hezkuntzaz frantsesa izan arren, berak dagoeneko aitortu didanez.
Familia gehitzea beti ere pozgarria omen da.
