Gipuzkoako Foru Aldundiak iragarri duenez, datozen egunotan Juan San Martin eibartar mendizale eta euskaltzainaren 7000 argazkiz osaturiko bilduma jarriko dute sarean.

Argazkiok GureGipuzkoa.net webgunean jarriko dituzte, lizentzia librearekin eta denontzat eskuragarri. Lehendik ere badira beste bi bilduma handi webgune berean: Indalecio Ojanguren eibartarrarena eta Sigfrido Koch argazkilariarena. Horiez gainera, beste bi erakunde handiren argazki-sortak sareratzen ere hasiko dira laster: Kutxarena eta Aranzadirena.